*
*
*
*
*
*
*खबरों में बीकानेर*
राजस्थानी रामलीला मांय लिछमण मूर्छा री लीला देख’र दर्शक होग्या भावुक
सूरतगढ
राजस्थानी रामलीला संस्थान री ओर सूं बिरामण धरमसाळ रै अगूणै पासै बण्यै हनुमान चौक मंच पर खेलीजण वाळी राजस्थानी रामलीला नै राजस्थानी भासा री मानता री कड़ी में करया जा रैया संघर्ष नै गाँव - गाँव, ढाणी - ढाणी पुगावण री हुँकार भरीजगी। रामलीला मांय बीती रात लिछमण मूर्छा, हनुमान जी रो संजीवनी बूंटी ल्यावणो, कुभकरण ने जगावणणो, उणरो जीमणो, रावण रै दरबार मांय अंगद रा पग जमावणो आद लीलावा देख'र भावुक होयग्या देखणआळा। लीला मांय अंगद रो रावण रै दरबार में पग जमावणो अर मेघनाथ - कुंभकर्ण आद किणी ई राक्षस सूं पग नीं उठा सकणो मेघनाथ रो सगती बाण सूं मूर्छित करण रा दरसाव घणो रोचक ढंग से मंचन करयो गयो। पांवणा डॉ राजेन्द्र कुमार शर्मा भगवान राम री आरती करगे लीला री सरूआत करवाई।
इण रात री लीला मांय अंगद री भूमिका में नंदू , हड़मान - संजय बिश्नोई, राम - राजेश लाम्बा , लिछमण - प्रदीप जसूजा, रावण - मनोजकुमार स्वामी, कुंभकर्ण - सीताराम शर्मा, सुग्रीव - विनोद औझइया, कालनेमी - नितिन, विभीषण - अनिकेत, जामवंत -राहुल बिश्नोई, नाच मांय दिव्या भाकर अर तपेश स्वामी आपरी कला सूं अणुतो कमाल दिखायो। पांवणा कानीं सूं राजस्थानी भासा सारू जैपुर, दिल्ली सरकार नै चेतायो कै बगत रैया इण संवेदनशील मुद्दै सारू सरकार नै चेतणो चाइजै। नंईस तो राजस्थान री जनता आवण आळा विधानसभा, लोकसभा चुनावां में सबक सिखा देसी।
सवांदा री बानगी :-
अंगद - जिकै राक्षसा पर तू फुलयो बो तेरो धोखो है, छळ है।
चंगो लेवू हूं परीक्षा, देखूं आमैं कितरो बळ है।
राम - ओ अन्यायी मेघनाद तेरो वार चालग्यो, ओ दुस्ट रावण आज तैरे घी रा दिया चसता होसी, व्हाली सीता अब तू रावण री कैद सूं छूटणै री आस छोड़दे.....।
write views