तप-त्याग जी मूर्ति संत कंवर राम
संत कंवरराम साहिब जो जनमु सिंधु ( हाणे पाक में ) जे सक्खर जिले जे मीरपुर माथेलो तहसील जे जरवार गोठ में 13 अप्रैल 1885 वैशाखीअ डिहुं थिओ हो। माता तीर्थबाई ऐं पिता ताराचंद संतोषी ऐं संस्कारवान हुआ। गरीबीअ में बि भगवत भजन कंदे संतोष सां गुजर कनि पया। तीर्थबाई संत खोतराम साहिब जी शेवा कंदी हुई। उननि जे आशीर्वाद सां उननिखे पुट रत्न जी प्राप्ति थी। संत खोतराम नालो रखियो कंवर यानी कमल। भविष्यवाणी कयवूं के जीअं कमल जो गुलु गप में बि महकंदो ऐं चिमकंदो आहे तीअं इ कंवरराम बि दुनिया खे बलिदान जो दगु ऐं तप त्याग जो महताव बुधाइंदो। दुनिया डिठो, संत जी वाणी सचु थी। कंवरराम जे आवाज में ऐतिरी मिठास हुई के उननि जो भजन बुधण वारो खुदबखुद भक्तिअ में लीन थी वेंदो हो। बालक कंवरराम हिकु भेरो कोहर विकणंण निकतो त भजन गाइण लगो। उनिजो मिठो आवाजु बुधी संत खोतराम उनिखे सडायो ऐं आशीर्वाद डिनाउंसि। कोहर यानी छोला, चणा। कोहर जो माइना ईअं समझी सघबो आहे, कोई मुहिंजे पापनि खे हरे वठे। संतनि जी भगति ऐं समाज लाइ शेवा जे कमनि बाबत तमाम दुनिया खे जाण आहे। अजु जेहि सिंधी लोककला शैली भगत जे संरक्षण जी चिंता फिकरु समाज खे सताए रही आहे, उनि भगत लाइ बि संत साहिब मशहूर आहिनि। संतनि जा गीत भजन माण्हूंनि जी जुबान ते रहंदा आहिनि। चवंदा आहिनि के शिकारपुर जे शाही बाग में संतनि पहिंजी भक्तिअ ऐं तप जे बल सां हिक माउ खे उनिजो मुअलि पुटि जीआरे डिनो हो। उननि भगत शैली जरिये दुनिया खे सत्य, अहिंसा, साम्प्रदायिक सौहार्द्र, विश्वबंधुत्व, ईशवंदना, मानवीय प्रेम, समता ऐं नैतिक आचरण जो संदेशु पहुंचायो। जहिंखे माण्हूं सुझु चंडु हुजण तोणी विसराए कोन सघंदा। हिकु भेरो सक्खर में महात्मा गांधीअ जी सभा में गोर थिए पयो तडहिं बि संत साहिब भगत पेशु करे गोर खे शांत करायो। उननि जी भगत गाइण ते महात्मा गांधीअ बि साराह कई हुई। संत कंवरराम साहिब जी जीवनीअ जे बारे में तकरीबन सभई जाण रखंदा आहिनि। लखनउ में संतनि जो वडो मंदिर समेत जिथे जिथे सिंधी परिवार रहनि था, उते उते संत कंवरराम साहिब जा मंदिर आहिनि। उननि जे बलिदान खे नई टेही बि महताव डिंदी आहे। 1 नवंबर 1939 जे डिहुं रुक स्टेशन ते बिनि बंदूकधारिनि उननि मथां बंदूक दागी। संत साहिब हरे राम चई शांत थिया। उननि जे आदर्शनि खे असां पहिंजे जीवन में अपनायूं त दुख कडहिं जीवन में अचनि ही न।
- मोहन थानवी
0 टिप्पणियाँ
write views